Cchiu giallo r’’u zzurfo
‘u faccione r’ abbronzo
ra quanno se ne sto ‘nchiuso
rint’’a pace r’’a cattedrale
cchiù giallo r’’u sole
fo luce llà biascio
‘nmiezzo a tutte chell’ombre
miezo busto penziaruso
ra luntano è tremenduto
comme se tremendeno ‘i ccose
ca ponno cagnò lu munno
e assale fanno paura
cchiù giallo r’’a freva
sto zitto e fo rumore
cchiù r’’i ttronole quanno
scioscia ‘a tempesta
sto zitto chillu faccione
scuro cchiù r’’u ggravone
ra vivo avrà giallo tenuto
lu purmone lu cannarone
ra vicino è assale vuluto
bene cu tutto chello
c’attuorno re isso se rice
ca si pure tenesse
che fo’ rruvine e mannò
carestia pe’ tutte pizze
buono se ne sto e benedice
cchiù giallo r’’u ggrano
fo abberé ca s’attizza
mo po’ ausulea ‘i vvoce
ca ra sottoterra saglieno
e voce so’’i patemiento
e lacreme so’’i ‘nguttemiento
ca scardule appuntute trascinano
fino a dda l’ombra soja
carma e ‘nnucente
fino a dda chella putenza
roce e cucente
ca rinto a ll’uocchie suoje
‘i scorrere se sente
è zurfo ca sbatte e vólle
‘ncoppa a lu faccione ‘nzurfato
è zurfo ca ra Pezzule
arriva a Nnapule fino
a li vvéne stutate fino
a li pprete appicciate fino
a li muorte scafutate
rinto ‘i rrotte ‘nfrancesiate
ll’uocchie suoje chiamano
ll’aneme biate
ca ra lu zurfo se so’ sarvate
zurfo antico e smaleritto
pe’ mille vocche e pertose
ra nu munno a n’ato fiuto
e isso lu faccione santo
se ciacea nun pepetea
rinto a lu zzurfo re li penziere
nun tene ciato
tutto ‘gnuvato
rinto a lu zurfo re li peccate
‘nzurfate ‘i malo li peccatore
ch’ànno ‘mpestato chistu paese
e zurfo cchiù zurfo atu zurfo
affannasse sti ssanguisughe
chesti carcasse…